Шведска се сомнева дека ќе влезе во НАТО до јули
Шефот на шведската дипломатија денеска изјави дека повеќе не е сигурен оти неговата земја ќе може да влезе во НАТО до јули, пренесе Ројтерс.
Шведска изрази желба да стане дел од воената алијанса по руската инвазија на Украина минатата година, но Унгарија и Турција досега не го одобрија нејзиното барање.
Министерот за надворешни работи на земјата, Тобијас Билстром, минатата недела изјави дека Шведска сигурно ќе стане членка на НАТО до самитот на воената алијанса во Вилнус во јули. Тој, пак, денеска за шведската новинска агенција изјави дека во последните денови ги набљудувал изјавите на другите земји, особено оние на Унгарија, и тие се знак дека треба повторно да размисли за тоа што го кажал. „Можеби „можно“ е подобриот збор во овој контекст“, рече тој.
Еден ден претходно, портпарол на унгарската влада изјави дека кандидатурата на Шведска е во мирување поради критиките на Стокхолм за политиката на унгарскиот премиер Виктор Орбан.
Турција ја обвини Шведска дека е домаќин на членови на Курдистанската работничка партија, која Анкара и нејзините западни сојузници ја сметаат за терористичка организација. Односите меѓу двете земји дополнително се влошија во јануари поради протестот во близина на турската амбасада во Стокхолм, во кој екстремно десничарски политичар запали примерок од муслиманската света книга Куранот.
Шведската влада соопшти дека сериозно ги сфатила забелешките на Турција, но додаде дека има барања што Шведска не може да ги исполни, како што е екстрадиција на луѓе кои Турција ги смета за опасни.
Финска изрази желба да стане членка на НАТО заедно со Шведска. Нејзината кандидатура беше одобрена од Унгарија во понеделникот и се очекува наскоро да биде ратификувана од Турција.
