Шукова: Имаме позитивно мислење за стратешките инвеститори, земјоделското земјиште е од пониска класа
Министерката за животна средина, Каја Шукова, во утринската емисија на „Слободен печат“ рече дека нејзиниот ресор ја прегледал целата документација на четирите стратешки инвеститори и не е најдена забелешка зошто да не се склучат договорите.
Во Собранието се предлог-законите за реализација на стратешките проекти: „Соларна електрична централа – Пехчево“, на стратешкиот инвеститор, ХЕК „Солар“ МК ДОО Негрево, Пехчево, вреден околу 51,9 милиони евра, стратешкиот инвестициски проект „Соларен парк Стипион“, на „Остро солар“ ДООЕЛ Скопје за изградба на фотоволтаична централа од 400 мегавати, вредна 270 милиони евра, инвестицискиот проект „Митилинеос“ за когенеративна постројка Скопје и стратешкиот инвестициски проект АИМ „Греен ТЕЦХ“, на стратешкиот инвеститор, АИМ „Греен ТЕЦХ“ ДООЕЛ Скопје, со кој ќе се комбинираат соларна енергија, мотори на гас и можност за батерии за баланс во мрежата.
„Подржуваме вакви инвестиции од обновливи извори на енергија. Од наш аспект, разгледани се сите инвеститори. Нашите препораки ги дадовме и начелно не се соочуваме со предизвици“, рече Шукова.
Конкретно, за француската инвестиција – соларен парк „Стипион“ на „Акуо Енерџи“, таа рече дека иако зафатената површина ќе биде огромна, поголемиот дел од плодното земјоделско земјиште во Штип не е од прва и втора класа.
„За земјоделското земјиште, вакви позитивни примери со агроволтаици има во Европа. Горе се фотоволтаиците, а доле може да го работите земјиштето.
Се разговараше на ниво на Влада да не се зафаќаат површини во прва и втора категорија, а инвеститорт ќе зафати повеќе површина од трета, четврта и петта класа“, додаде министерката.
Шукова рече дека негативните реакции ќе донесат само штета за енергетската сигурност на земјата и дека веќе се инсталирани 600 мегавати нови инвестиции.
„Стипон“ требаше да се гради првично на 450 хектари, да бидат инвестирани 270 милони евра со капацитет за произвоство од 360 до 400 мегавати.
Претходно од Владата рекоа дека „Акуо Енерџи“ се откажал од 160 хектари од парцелата на која било најплодното земјиште.
