Шестмина средношколци ја испишаа математичката историја на Македонија, еве колку медали освоија!
Шестмина средношколци од Македонија, предводени од двајца ментори и со поддршка од повеќемина ентузијасти деновиве ја испишуваат математичката историја на независна Македонија.
Тие се натпреваруваа на 64. Интернационална математичка олимпијада, најпрестижен светски натпревар за млади математичари кој годинава се одржа во Чиба, Јапонија од 3 до 13 јули, а нивниот труд кулминираше со златен, сребрен, бронзен медал и пофалници.
– Млади умови од целиот свет се натпреваруваа во решавање на шест математички проблеми во текот на два натпреварувачки дена. Магичниот број (целосно решение) кон кој се стреми секој од натпреварувачите изнесува 7 (поени по задача) – велат од Сојузот на математичарите на Македонија (СММ).
Според нив, ова е исклучителен успех за државата.
– Ова е исклучителен успех за нашата земја, која годинава во конкуренција на 113 земји ширум светот екипно се пласира на 24. место (според освоени одличја) односно, на 41. место (според освоени поени) – велат од Сојузот.
Водач на тимот беше Илија Јовчески, а заменик-водач – Мирко Петрушевски. Ова се достигнувањата на македонскиот тим годинава:
ДАМЈАН ДАВКОВ (златен медал; 32 поени = 7+7+7+7+2+2)
АЛЕКСИЈ ТАСИЌ (сребрен медал; 25 поени = 7+7+1+7+3+0)
НИКОЛА ЦВЕТАНОСКИ (бронзен медал; 23 поени = 7+7+0+7+2+0)
НИКОЛА СПИРОВСКИ (бронзен медал; 19 поени = 7+3+0+7+2+0)
ЈАН СТОЈАНОВСКИ (пофалница; 17 поени = 7+1+0+7+2+0)
БРАНКО ЈАНГЕЛОВСКИ (пофалница; 11 поени = 7+3+0+1+0+0)
