Секој Македонец лани создал во просек по 438 килограми отпад!
Минатата година во земјава се создадени вкупно 790 866 тони комунален отпад, што претставува пад во споредба со претходните години. Според податоците од Државниот завод за статистика, секој жител во просек создал по 438 килограми отпад, што е значително намалување во однос на 2023 година, кога просекот изнесувал 503 килограми по жител.
Од вкупно создадената количина, собрани се 637 471 тон комунален отпад. Загрижувачки е фактот што целокупното количество на собран смет завршува на депониите низ државата. Дефиницијата за комунален отпад го опфаќа сметот од домаќинствата, бизнисите, институциите, уличниот смет и отпадот од градините, но ги исклучува градежниот шут и отпадот од канализациските мрежи.
Во делот на рециклирањето, податоците на Министерството за животна средина покажуваат дека се рециклираат 65 проценти од отпадот од пакување. Најдобри резултати има кај хартијата и картонот, каде е забележано целосно рециклирање на пуштените количини на пазарот, а потоа следат металот со 80 проценти и стаклото со 54,6 проценти. Најнизок степен на рециклирање е забележан кај пластиката и дрвото.
На полето на финансиите, трошоците за заштита на животната средина во 2024 година изнесувале 169,4 милиони евра. Оваа сума е помала од приходите собрани преку еколошки даноци, кои во 2023 година на државата и донеле 196,7 милиони евра.
