СЕ ЗАПИШУВАЛЕ НА МАГИСТЕРСКИ СТУДИИ БЕЗ ДА ЗАВРШАТ ФАКУЛТЕТ Министерката Јаневска чека извештај од Филозофскиот факултет
Филозофскиот факултет при Универзитетот „Св. Кирил и Методиј“ – Скопје треба да постапи по заклучоците на Државниот просветен инспекторат (ДПИ), кој при извршен надзор констатирал нерегуларности при упис на студенти на магистерски и на докторски студии.
Министерката за образование и наука Весна Јаневска соопшти дека Филозофскиот факултет на УКИМ веќе постапува по заклучоците на Инспекторатот и таа чека извештај по што ќе донесе конечно решение во врска со случајот.
– Констаторани се нерегуларности на Филозофскиот факултет, но не при упис на додипломски, туку за упис на втор и на трет циклус студии. Државниот просветен иснпекторат постапуваше, донесе заклучоци, го информира Факултетот, кој треба да постапи. Колку што ми е познато, Факултетот постапува и јас го чекам конечниот извештај за кога ќе помине рокот за постапување, како министер овластен во оваа област да го донесам и конечното решение – изјави Јаневска одговарајќи на новинарски прашања пред отворањето на настанот „Зеленикс – од предизвик до иновација“, организиран од Агенцијата за иновации, научно-технолошки развој и претприемаштво – ИНОВА.
Порталот МКД.мк објави дека студенти без завршени додипломски студии на Филозофскиот факултет при УКИМ биле запишувани на магистерски, а потоа и на докторски студии, односно не биле исполнети условите од Законот за високото образование. Тоа било откриено од Државниот просветен инпекторат и на запишаните студенти им биле прекинати студиите.
Станува збор за десетина запишани студенти на кои по интервенција на инспекторите им биле прекинати студиите, а тие сега бараат враќање на парите што ги дале за упис на втор, односно трет циклус студии.
.
