Се сретнаа Путин и Кадиров, објавени детали, шефот на НАТО ненадејно дојде во Киев
Рускиот претседател Владимир Путин во Москва го прими чеченскиот лидер Рамзан Кадиров. Тие разговараа за меѓусебните односи и за состојбите на бојното поле. Кадиров на видеото не покажува знаци на здравствени проблеми, иако неодамна имаше шпекулации дека е во болница со опасни по живот состојби, што чеченскиот лидер го негираше.
„Динамиката на развојот на Чеченија се движи во позитивна насока во голема мера благодарение на вас и вашиот тим. Вашите луѓе работат посветено. Дел од сето тоа е резултат на блиската соработка со руската влада. Имаме цела серија сериозни програми и задачи“, изјави Владимир Путин, рускиот претседател.
„Пред да почнеме да зборуваме за Чеченската република, би сакал да ви покажам што правевме на територијата на специјалната воена операција од почетокот до денес. Дури би се пофалил со хуманитарната страна на сè и со извештаите од бојно поле. Вашиот тим има добри резултати. Секој ден земаат заробеници и уништуваат воени возила“, рече Рамзан Кадиров, чеченскиот лидер.
НАТО склучи рамковни договори за 2,4 милијарди евра клучна муниција за Украина, вклучително и 1 милијарда евра нарачки, изјави генералниот секретар Јенс Столтенберг за време на ненајавената посета на Киев, пренесува Ројтерс.
Тој рече дека таквите договори ќе им овозможат на членките на НАТО да ги надополнат своите исцрпени залихи додека ќе продолжат да ја снабдуваат Украина со муниција, клучен фактор во војната.
Столтенберг ги осуди и руските напади во близина на границата на Украина со членката на НАТО Романија. Тој рече дека нема докази дека таквите напади се намерен напад врз Романија, но ги означи како „непромислени“ и „дестабилизирачки“.
