Пелетите остануваат со повластена даночна стапка, како и дигиталните учебници

Министерството за финансии објави дека Владата денеска ја усвои листата од околу 1.600 производи кои остануваат со повластена даночна стапка од 5 отсто, а на истата остануваат и пелетите за загревање.

Претходно Владата пред два и пол месеци донесе одлука ДДВ-то за пелетите за загревање да се зголеми од 5 на 18 проценти, што наиде на негативни реакции во јавноста.

„Владата, денеска, а согласно донесените измени на Законот за данок на ДДВ, усвои и Одлука за примена на повластена стапка на ДДВ од 10%, за производи кои имаат помала потрошувачка и имаат третман на луксузен производи и не претставуваат основни производи во исхраната. На оваа листа се производи како месо од ирваси, лосос, сирење со сина мувла, сирење од типот toffy, јагула, семе од лен, масло од палма и кокосов орев, кавијар, школки, тропско овошје како папаја, манго и авокадо и слично. Вклучувањето на дел од производите коишто ќе се оданочуваат со оваа стапка е со цел да се заштити здравјето на граѓаните. Имено, овие две листи ги содржат скоро сите прехранбени производи кои се користат од страна на граѓаните“, објави МФ.

Министерството, исто така, информира дека со повластена даночна стапка ќе се продаваат и дигиталните учебници.