СЕ ОГЛАСИ ТРУДО: Канада ќе воведе тарифи од 25 отсто на американски стоки
Не само Мексико, туку и Канада најави контрамерки откако американскиот претседател Доналд Трамп воведе царини за стоките од овие земји. Дел од мерките стапуваат на сила во вторник, а другите за 21 ден.
Канадскиот премиер Џастин Трудо изјави дека државата ќе воведе тарифи од 25 отсто на американски стоки увезени во Канада во вредност од 155 милијарди канадски долари (102,7 милијарди евра), како одговор на тарифите од 25 отсто, што ги наметна САД.
Премиерот на Канада предупреди дека новите царини ќе им наштетат на САД и ги повика Канаѓаните да купуваат канадски производи и да го поминат својот одмор во нивната земја, а не во САД, објави Танјуг.
Претседателот Доналд Трамп во саботата потпиша извршна наредба за воведување царини од 25 отсто за сите стоки од Канада и Мексико почнувајќи од вторник, освен за енергетските производи од Канада, кои ќе подлежат на царина од 10 отсто. Царини има и за Кина.
Откако ја презеде функцијата претседател на САД, Трамп предизвика контроверзии со идејата Канада да се спои со САД како и Гренланд, но и идејата за враќањето на Панамскиот канал предизвика гнев во Панама.
