Нови информации за исчезнатиот Миле од Неготино: Пронајден неговиот телефон покрај реката Луда Мара
Три дена трае потрагата по 28-годишниот Миле Тодоров од Неготино, кој на 30-ти јануари, по неговото предавање на оставка на работното место во Кавадарци, исчезнал. Тој заминал во непознат правец околу осум часот наутро.
Според информациите од неговото семејство, Миле најверојатно пеш тргнал од Кавадарци кон Неготино и околу 10:30 часот бил виден близу селото Марена.
Денес, мобилниот телефон на Миле беше пронајден покрај реката Луда Мара, помеѓу Глишиќ и Марена, во близина на местото познато како Три багрема.
„Потрагата за денес е завршена. Имаме мобилизирани доброволци од градот, а и полициски службеници се вклучени во потрагата. Целата река е проверена, посебно делот каде беше пронајден мобилниот телефон, но не најдовме ништо. Имаше и куче трагач, но поради големиот број луѓе на теренот, веројатно се помешале траговите и кучето не можеше да го следи точниот пат,“ велат роднините на Миле.
Тие исто така апелираат до надлежните институции за поголема помош: „Само полицијата и доброволците не се доволни. Три дена поминаа без резултати! Апелираме до Центарот за управување со кризи и специјализираните единици, да испратат тимови со термални камери и дронови, бидејќи сме беспомошни.“
Од СВР Велес потврдуваат дека момчето сè уште не е пронајдено. Семейството апелира и за помош од јавноста. Доколку некој има информации за неговото местоположение, веднаш да се јави во полиција.
Роднините додаваат дека Миле може да биде било каде, не само во областа каде беше пронајден неговиот мобилен телефон, и потрагата треба да биде опсежна, бидејќи можеби се наоѓа на сосема друга локација.
