СЕ МЕНУВА ТОПТАН БОРДОТ НА ДИРЕКТОРИ НА ПРИЛЕПСКИ ТУТУНСКИ КОМБИНАТ – Владата ќе одбере нови повереници, имињата засега се во тајност
По ГТЦ, на ред дојде и
Тутунски комбинат од Прилеп. Акционерските друштва каде што Владата е мнозински
сопственик, ги менуваат досегашните членови на управните одбори, поставени од
претходната власт.
Прилепскиот тутунски
комбинат ќе ги менува членовите на Управниот одбор, но не се знае, барем јавно,
кои лица ќе дојдат на нивните позиции.
За 4 ноември годинава е
закажано Собранието на акционерите на овој комбинат, а на него се ставени
одлуки за отповикување на старите и за избор на новите членови на Управните
одбори.
Овие одлуки, како што се
наведува во јавниот повик за одржување на Собранието на акционери, ги предлага
доминантниот акционер на Тутунски комбинат Прилеп, а тоа е Владата.
На предлог на Владата
треба да се отповикаат следниве членови на Одборот на директори: Зоран
Пачешкоски, Гоце Котески и Горан Тодоров, кои се извршни членови на Бордот, потоа
Сретен Богоески и Миле Велкоски, кои се независни и неизвршни членови, како и
Златко Сарев и Милаим Амеди, кои се неизвршни членови.
Во образложението за отповикување на сите овие членови е наведено дека Собранието
може да ги отповика сите членови на Одборот
на директори, односно на Надзорниот
одбор, односно член на овие органи и пред истекот на времето за коешто биле
избрани. За одлуката за отповикување е потребно мнозинство гласови од акциите
со право на глас, претставени на Собранието,
освен ако со статутот
не е определено поголемо мнозинство. Со статутот можат да се определат и други
услови за усвојување на одлуката.
А, за одлуките се наведува дека стапуваат во сила веднаш од денот на
нивното донесување.
Во предлогот за именување на нови членови на
Бордот, пак, не се наведени имиња на новите предлози за највисокото раководство
на комбинатот, а во образложението само стои дека тие ќе се изберат со мандат
од четири години, како и дека членовите на Одборот на директори и членовите на Надзорниот одбор ги избира
собранието со мнозинство гласови од акциите со право на глас од кворумот
определен за работа на Собранието.
Н.Н.Ф.
