Самсоненко повлече нога! Кој купи, а кој продаде акции на „Жито Полог“ за 168.300 евра?

Кичевскиот акционер ги преполови своите акции во „Жито Полог“ за надомест од 168.300 евра, односно околу 37 евра за секоја акција. Акциите ги купија: најголемиот акционер „Орка холдинг“, „Жито Полог“ (најголем дел) и скопското друштво „Лид Комуникејшнс“.

Тетовската компанија за производство на брашно и леб е повторно во фокусот на инвеститорите во акции. И овој пат станува збор за интерни трансакции што значи прераспределба меѓу актуелни акционери.

Берзата потврди дека во периодот од изминативе две недели во „Жито Полог“ во блок трансакции се истргувани 8,1 отсто од акциите. Продавач е актуелниот акционер – кичевската фирма „АС Сењак“ која отуѓи 8,1 отсто од сите акции, а повеќе од половина од сите свои акции со право на глас што ги поседуваше во „Жито Полог“, вкупно 4.562 акции со право на глас.

Од најновите податоци кои се објавени на веб страната на Централниот депозитар за хартии од вредност е видливо дека акциите на кичевецот Селаудин Арифи преку неговата фирма „АС Сењак“ ги купија три постоечки акционери. Најголем дел од акциите откупи токму компанијата „Жито Полог“ и за нив плати 85.700 евра. Со новостекнатите 5 отсто сега ова друштво во сопствен откуп чува 15 отсто од сите акции во компанијата.

Своето учество за мал процент со последната продажба го зголемија уште два постоечки акционери. Најголемиот поединечен акционер скопската компанија „Орка холдинг“ докупи 2 отсто од сите акции и сега поседува 25 отсто од сите гласачки права во „Жито Полог“.

Еден од помалите поединечни акционери скопското друштво „Лид Комуникејшнс“ докупи 1 отсто од акциите и сега има 12 отсто од главницата на полошкиот производител на леб.

По продажбата на овие акции „АС Сењак“ останува да биде акционер и сега поседува 5,6 отсто од сите акции во „Жито Полог“.

Останати поголеми акционери се: Сергеј Самсоненко со 20 отсто, Ненад Јосифовиќ со 12,5 отсто и скопското градежно друштво „Софија Градба“ со 5,1 отсто од акциите.

„Жито Полог“ во првиот квартал годинава работел со загуба. Официјалните неревидирани финансиски податоци покажуваат дека друштвото од јануари до март од продажба инкасирало околу 950.000 евра што е за половина помалку од истиот период лани.

Оперативните расходи на компанијата за овој период изнесувале речиси 1,1 милиони евра, а оперативната загуба е речиси 100.000 евра.

Повеќе на темава на следниот линк https://faktor.mk/po-kupuvanjeto-na-akciite-samsonenko-sega-ima-1986-otsto—zito-polog-gi-objavi-promenite-vo-akcionerskata-struktura

Р.Ф.