Од колкави плати се откажаа Васко Ковачевски, Хари Локвенец и Славица Кутиров?
Во релативно краток период изминатите месеци оставки поради лични причини, барем како што официјално беше соопштено во јавноста, поднесоа тројца директори на три важни државни институции од економско општествен интерес – Васко Ковачевски, Хари Локвенец и Славица Кутиров.
Прв кој ја објави својата оставка беше Васко Ковачевски, генералниот директор на АД ЕСМ, акционерското друштво кое лани потроши повеќе од 500 милиони евра, поголемиот дел за справување со енергетската криза.
Ковачевски во април по безмалку четири години директорување лично ја соопшти својата оставка пред јавноста, а на негово место Владата го назначи Васко Стефанов. Во финансискиот извештај на ЕСМ за 2022 нотирно е дека генералниот директор преку минатата година остварил вкупна бруто плата од 1.621.754 денари. Искалкулирано, неговата нето годишна плата би била 1.285.053, или месечно тоа би било околу 1.750 евра.
Локвенец на почетокот на јуни објави дека повеќе не е прв човек на Јавното претпријатие „Железници на РСМ – инфраструктура“. Тој на функција на ова железничко претпријатие беше од ноември 2020 година.
Минатата година „Инфраструктура“ ја започна изградбата на пругата кон Бугарија откако ги потпиша договорите со изведувачите. Од потрошените околу 220 милиони евра, најмногу пари се инвестираа токму за Коридорот 8. Во извештајот за работењето на ова претпријатие за 2022 транспарентно пишува дека основната плата на директорот е 78.762 денари месечно, или 1.300 евра. Зоран Трифуновски беше именуван за в.д директор како замена за Локвенец.
Минатата недела оставка од лични причини поднесе и Кутиров како раководител на Царинската управа. Во нејзиното обраќање нагласи дека кариерата ја продолжува меѓународно, а на нејзиното место беше назначен Стефан Богоев, поранешниот градоначалник на Карпош и актуелен потпретседател на СДСМ. Во извештаите на Царина може да се прочита дека минатата година биле наплатени безмалку 2 милијарди евра, односно 15 отсто повеќе за една година, но никаде не се споменува колкава била платата на Кутиров.
А:К.
