Русија ги зголемува казните за непријавување во воениот регистар
Претседателот на Русија Владимир Путин потпиша закон за зголемување на казните за непријавување во воениот регистар, а тој документ е објавен на официјалниот портал за добивање правни информации, пренесуваат руските медиуми.
Според извештаите, сега за непојавување при запишување во воениот регистар без добра причина, казната ќе биде од 10.000 до 30.000 рубљи (од 100 до 300 евра), додека претходната казна за таков прекршок била до 3.000 рубљи (30 евра).
Ако државјанин на Русија не пријави во надлежната канцеларија за промена на брачниот статус, образованието, положбата, промената на местото на работа или студирањето или преселувањето во ново место на живеење, ќе се казни со парична казна од 1.000 до 5.000 рубљи (10 до 50 евра), што претходно беше до 3.000.
Казните за избегнување лекарски преглед ќе бидат зголемени од 3.000 на 25.000 рубљи (од 30 на 250 евра), а оној што намерно ќе ги оштети или изгуби документите за воена регистрација ќе треба да плати до 5.000 рубљи (50 евра).
Казна од 5.000 до 15.000 рубљи (50 до 150 евра) им се заканува на оние кои повеќе од шест месеци не го известиле надлежниот орган за своето заминување од Русија или не се појавиле навреме во војска.
Оние кои се предмет на регрутирање за воена служба, а не пријавиле дека го напуштаат местото на живеење за време на воениот рок, се соочуваат со парична казна од 10.000 до 20.000 рубљи (100 до 200 евра).
