РОДЕНИ СЕ ВО СТРАНСТВО: Јавниот обвинител од Брчко откри детали за децата најдени во куќа во градот
Децата кои беа најдени во Брчко се родени во странство.
Утврден e идентитетот на пронајдените деца во Брчко во Босна и Херцеговина(БиХ) и од нив шест се родени во Италија, две во Барселона во Шпанија, пет во Хрватска.
Вршителот на должноста јавен обвинител во Брчко, Радмило Ивановиќ, денеска изнесе детали за идентитетот на децата пронајдени неодамна во куќа во населбата Брчко и објасни дека за 12 од вкупно 31 дете уште немаат веродостојни информации за нивниот идентитет.
„Имаме 31 дете. Можеме да кажеме дека идентитетот на 19 од нив е утврден, од кои 14 се утврдени врз основа на лични документи што ги имале или што ги донеле овие родители“, рече Ивановиќ, пренесува Euronews.ba.
Тој кажа дека седум деца се на возраст од 2 до 3 години, шест деца се на возраст од 4 до 6 години, три се на возраст од 7 до 9 години и две деца се на возраст од 10 до 12 години.
„За 18 од нив е познато местото на раѓање: шест од нив се родени во Рим, пет во Хрватска и едно во Риека, две деца се родени во Барселона, едно во Ница, а две деца се родени во Босна и Херцеговина. Шест од нив се пријавени во Мостар, три во Загреб, две во Тузла, две во Брчко и едно дете во Риека“, рече Ивановиќ.
Двајца од осумте досега приведени за овој случај се осомничени за запоставување и злоупотреба на деца.
Жена на периферија на Брчко ги чувала децата, а соседите кажаа дека таа добро се однесувала со нив. Случајот го шокираше регионот.
