Ристовски вели ако имало местење и двата клуба ќе ја загубат лиценцата – Башкими: Нема никаков доказ, ни индикација дека Башкими играл нефер!
Во мечот одигран вчера во Гевгелија, Кумановци триумфираа со 2-1 благодарение на гол во 92. минута, за кој многумина сметаат дека бил постигнат под сомнителни околности. Победата им донесе вредни бодови во битката за директен пласман во Првата лига, но начинот на кој стигнаа до неа отвори сериозни прашања.
Веднаш по завршувањето на средбата, на социјалните мрежи и во медиумите се појавија бројни реакции, обвинувања и сомнежи дека натпреварот бил договорен. Министерот за спорт, Борко Ристовски, реагираше остро и најави санкции.
„Ако се утврди дека имало местење, и Кожуф и Башкими ќе ја загубат лиценцата за спорт“, изјави Ристовски.
Настанот доби големо медиумско внимание, а надлежните институции веќе започнаа со истрага. Очекувањата се дека наскоро ќе има официјални информации за можните неправилности.
Со соопштение синоќа се јави Фудбалскиот клуб Башкими кој се обиде да се одбрани, но не го објасни најважниот дел – зошто противникот му дозволи лесно да постигне гол во момент кога имаше бод „в џеб“.
„Нашиот клуб, со најголема одговорност информира дека секој натпревар, вклучувајќи го и овој со Кожуф, е чист и заслужено ги освоивме трите бода во нашата борба за пласман во Првата лига. Силно веруваме дека нападот врз нас брзо ќе се заборави бидејќи нема никаков доказ, ни индикација дека Башкими играл нефер“, објави, меѓу другото, кумановскиот клуб.
Фудбалската федерација на Македонија (ФФМ) со длабоко разочарување и огорченост го следеше натпреварот помеѓу ФК Кожуф и ФК Башкими од Втора МФЛ.
„Сцените што сите ги видовме на теренот и однесувањето на поединци претставуваат директна навреда за фудбалот, за фер-плејот и за сите што со чесна намера учествуваат во спортот. Она што го видовме е срамно и неприфатливо. Ова раководство на ФФМ нема да дозволи ваквите појави да станат норма, ниту да поминат без последици“, рекоа од ФФМ.
На две кола пред крајот на Втората лига, Башкими се наоѓа на третата позиција на табелата, со бод помалку од второпласираниот Арсими и три од лидерот Македонија ЃП. Сето ова може да падне во вода ако Фудбалската федерација ги казни учесниците во вчерашниот скандалозен натпревар.
