Психолог останала без работа по најавата за бременост, го изгубила бебето во седмиот месец

Психолог од ЈЗУ Општа болница Струга, магистер по специјална едукација и рехабилитација и психотерапевт со долгогодишно искуство, останала без работа веднаш по најавата дека е бремена, пишува СДК.мк.

Според пријавата до Комисијата за спречување и заштита од дискриминација, поради стресот од непродолжувањето на договорот и фактот што по нејзиното заминување биле вработени 65 нови лица, жената во 27. недела од бременоста го изгубила своето бебе.

Жената од 2001 година работела со договор на определено време, со полно работно време, практично како редовно вработена. По изборите минатата година, таа очекувала конечно решавање на својот статус, но на 31 декември 2024 година договорот не ѝ бил продолжен.

Во разговор со директорот, таа била известена: „Оди дома, имаш поважна работа. Бремена си.“ Во својата претставка до Комисијата таа приложила медицинска документација од Гинекологија дека бременоста била здрава и без ризици.

„Од стресот што го доживеав по губењето на работата, на 4 март 2025 година, во речиси 27 недела, го изгубив моето дете. Сум била здрава, со уредна бременост. Тортурата си го направи своето“, навела таа.

Комисијата за спречување и заштита од дискриминација утврдила дека се работи за директна интерсекциска дискриминација. Болницата и директорот не доставиле докази дека непродолжувањето на договорот не било поврзано со бременоста.

„Бременоста е биолошка карактеристика поврзана со полот и жената има посебна законска заштита, вклучително и кога работи со договор на дело“, наведува Комисијата.

Според заклучокот на Комисијата, станува збор за тежок случај на директна, повеќекратна и продолжена дискриминација. Жената сега има право да поднесе пријава и тужба до надлежните органи.