Прво опомени, па глоби: „Безбеден град“ целосно активиран во 2026 година!
Проектот „Безбеден град“ ќе биде целосно активиран следната година. Планирано е за првите шест месеци да има период на адаптација, при што граѓаните ќе добиваат само опомени за првични прекршоци, а не казни. Оние со странски регистарски таблички веднаш ќе бидат казнувани за непочитување на сообраќајните правила.
Премиерот Христијан Мицкоски информираше на денешниот брифинг дека технологијата што ќе се користи за имплементација на системот е современа, како во светските мегаполиси.
Според информациите од министерот за внатрешни работи Панче Тошковски, Мицкоски изнесе податоци дека секоја година во Македонија загинуваат околу 150 лица во сообраќајни несреќи, а во Скопје се вршат околу 22.000 прекршоци, како што се возење без дозвола, возење под дејство на алкохол и непочитување на сообраќајни знаци.
Активирањето на системот за електронско детектирање на прекршоци, познат како „Безбеден град“, е клучен приоритет на Владата, со цел да се подобри безбедноста на патиштата и да се намали бројот на жртви.
