Протест за скандалот на Онкологија: Остануваме на шесте ултиматуми како и досега
Платформата „Одговорност“, која од минатиот протест ја презема целокупната организација на протестите за сознанијата од Онкологија, и денеска повикува во 18 часот пред Владата на Македонија.
„Платформата ‘Одговорност’, повторно ќе потенцираме, е формирана од неколку граѓани што имаат изгубено член од семејството на Клиниката за онкологија и нема никаква политичка заднина“, велат од таму.
„Од минатата недела добивме и поддршка од онколошките пациентки, кои веќе некое време протестираат пред ОЈО. До 1 ноември остануваме со протести секој понеделник во 18 ч пред Владата на Македонија, а по 1 ноември, во консултација со онколошките пациентки ќе излеземе со соопштение на кој начин ги продолжуваме протестите.
Денес, 9.10.2023, на протестот нема да се обратиме ние организаторите бидејќи се подготвуваме за следниот протест на 16.10.2023, каде што ќе се обратиме со најновите информации и сознанија од Клиниката за онкологија.
Изминатава недела остваривме и контакт со неколку медицински лица и сме во постојана соработка со истражувачките новинари, кои ја почнаа оваа сторија, и згрозени сме од најновите сознанија. На 16.10.2023 ќе ги обелодениме дел од нив со вас медиумите и со јавноста.
За крај, остануваме на шесте ултиматуми како и до сега“, се додава во соопштението од организаторите.
