Пронајдени 204 тела по авионската несреќа во Ахмадабад

Индиските власти потврдија дека се пронајдени телата на 204 лица од патничкиот авион на „Ер Индија“ кој се урна само 30 секунди по полетувањето од аеродромот во Ахмадабад кон Лондон.

Според полицијата, авионот „Боинг 787 Дримлајнер“ сообраќал на линијата Ахмадабад – Гатвик, а на него имало вкупно 242 патници: 169 индиски, 53 британски, еден канадски и седум португалски државјани.

Портпарол на полицијата изјави за агенцијата ДПА дека речиси сите патници загинале, освен еден – 40-годишниот британски државјанин Вишваш Кумар Рамеш, кој седел на местото 11А и успеал да преживее. Во изјава за „Хиндустан Тајмс“ тој опиша дека уривањето било проследено со силен шум, веднаш по полетувањето.

Според информациите, авионот се урнал врз зградата на БЈ Медицинскиот факултет, при што делови од авионот – вклучувајќи ја слетувачката опрема, трупот и опашката – завршиле внатре во објектот. Видео-снимки што кружат на интернет покажуваат како авионот лета над станбена зона пред да исчезне зад дрвја, проследено со силна експлозија и оган.