„Марш на ангелите“ за првпат во Штип: Ова не е само марш – ова е чекор за сеќавање!

Здружението на граѓани „16-ти Март 2025“ најави одржување на 41. „Марш на ангелите“, кој за првпат ќе се организира во Штип. Настанот ќе се одржи на 18 април (сабота), на плоштадот „Слобода“, со почеток на собирот во 15:50 часот, додека маршот ќе започне во 16:05 часот.

Од здружението информираат дека маршот е посветен на 63-те жртви, повредените и нивните семејства, кои повеќе од една година се соочуваат со болката од трагедијата. Целта на настанот е да се оддаде почит, но и да се испрати силна порака за потребата од правда и одговорност.

„Ова не е само марш. Ова е чекор за сеќавање, чекор за вистината и чекор за правда“, велат организаторите, нагласувајќи дека настанот ќе се одвива мирно и достоинствено.

Тие ги повикуваат граѓаните да се приклучат и заедно да испратат порака дека жртвите не смеат да бидат заборавени, а правдата не смее да изостане.

„Не забораваме. Затоа чекориме“, порачуваат од здружението, потенцирајќи дека маршот претставува симбол на колективна меморија и граѓанска одговорност.