Приведен инспекторот за сообраќај на Општина Битола – барал мито

Инспектор за сообраќај вработен во Општина Битола барал мито од такси превозник. Поради тоа е приведен од полицијата. Нема детали за што бил баран поткупот и за колку пари се работи.

Според соопштението, криминалистичката полиција на СВР Битола до битолското обвинителство денеска (10.06) ќе поднесе кривична пријава против В. П. (53) од Битола, вработен во општина Битола како инспектор во инспекторатот за контрола на патниот сообраќај. 

„Пријавениот во периодот од 12 април 2023 па сѐ до денес, искористувајќи ја својата позиција и своето влијание како лице задолжено за контрола на превозниците во град Битола, во два наврати индиректно барајќи пари, од пријавителот 41-годишен маж од Битола, кој е управител и сопственик на правно лице за вршење дејност такси превоз, побарал и примил поткуп во два наврати и со тоа сторил кривично дело ‘Примање поткуп’. Тој во текот на вчерашниот ден е лишен од слобода и изведен пред јавен Обвинител“, изјави Сања Стаматова портпарол на СВР Битола. (А.Б.)