Приходите од руската нафта и гас паѓаат
Буџетските приходи на РУСИЈА од нафта и гас нагло се намалија во првиот квартал, како одраз на високата споредбена основа во 2024 година и пониските просечни цени, покажаа податоците на веб-страницата на Министерството за финансии.
Во периодот од јануари до март, Русија заработила 2,64 трилиони рубљи или 30 милијарди долари од нафта и гас, цитира новинската агенција ТАСС податоци на министерството.
Приходите се намалени за 9,8 отсто во однос на истиот период лани, пред се поради тоа што бројките за февруари 2024 година вклучуваат еднократен приход од данокот за екстракција на нафта, објаснуваат од Министерството за финансии.
Меѓу причините ја наведоа и пониската просечна цена на нафтата.
Фондот за стабилизација како заштита од пазарни флуктуации
Помалите приходи се „покриваат“ со „вишокот“ од поволниот ценовен период и пари од стабилизациониот фонд за заштита на буџетот од флуктуации на цените на нафтата и гасот, потсетуваат од министерството.
Флуктуациите на цените на нафтата се и главниот канал преку кој ескалацијата на царинските војни може да допре до руската економија, изјави денеска во Думата гувернерката на централната банка Елвира Набиулина.
„Главниот можен канал на влијание е флуктуацијата на цената на нафтата, падот на цената на нафтата“, објасни Набиулина.
Прогнози за цената на нафтата
Централната банка проценува дека барел нафта оваа година во просек ќе чини 65 долари. Во 2026 година неговата цена би требало да падне на 60 долари, пресметале тие.
На лондонскиот пазар во вторник попладне барел се тргуваше по 64,68 долари.
Буџетските приходи на Русија од другите економски сектори изнесуваат 6,4 трилиони рубљи (75 милијарди долари) во првиот квартал, што е за 10,6 отсто повеќе од истиот период минатата година, покажуваат податоците на Министерството за финансии.
