ПРЕТСЕДАТЕЛОТ НА ЕЦБ НАЈАВИ: Еве кога ќе се намалуваат каматите!
Европската централна банка ќе започне со намалување на каматните стапки откако ќе се увери дека инфлацијата се вратила на целта од два отсто, изјави претседателката на ЕЦБ, Кристин Лагард.
– Не можам да прецизирам точен датум кога ќе почнат кратењата – изјави Лагард во интервју за ТВ Франс 2 и додаде дека ќе има нови податоци во наредните месеци, и дека врз основа на нив ќе донесе одлука, пренесува Блумберг.
Инвеститорите сметаат дека првото намалување на каматните стапки би можело да се случи веќе во април, додека креаторите на монетарната политика сметаат дека е пореално тоа да се случи кон средината на оваа година.
Говорејќи претходно во четвртокот, шефот на хрватската централна банка Борис Вујчиќ рече дека пазарите сè уште се премногу оптимисти за времето на првото намалување, повторувајќи ги коментарите на членот на Извршниот одбор Изабел Шнабел претходниот ден, која ги нарече разговорите на оваа тема предвремени.
И покрај тоа што инфлацијата остана под три проценти дури и по порастот во декември, претставниците на ЕЦБ сакаат да видат податоци за зголемувањето на платите што ќе дојде дури по првиот квартал.
Лагард рече дека Европа не е во сериозна рецесија и дека најлошата борба против инфлацијата е завршена.
– Мислам дека го поминавме најголемиот, најтешкиот дел, освен ако не се соочиме со уште еден голем шок кога се во прашање платите – истакна претседателот на ЕЦБ.
– Платите, во однос на преговорите и колективните договори, се во процес на зголемување и на тој начин што ја надминуваат инфлацијата што ја имаме. Ние сме во фаза на фаќање, а тоа би можело да потрае две до три години – објасни Лагард, додавајќи дека трошоците за задолжување нема да се зголемат.
