Премиерката на Данска: Гренланд не е на продажба
Гренланд не е на продажба, изјави денеска данската премиерка Мете Фредриксен, откако американскиот државен секретар Марко Рубио минатата недела изјави дека интересот на претседателот Доналд Трамп за преземање на островите „не е шега“.
„Гренланд денес е дел од Кралството Данска. Тоа е дел од нашата територија и не е на продажба“, рече таа пред неформалниот состанок на лидерите на Европската унија во Брисел.
Трамп вели дека ќе ја направи автономната територија на Данска дел од Соединетите Американски Држави и не ја отфрли можноста да користи воена или економска моќ за да ја убеди Данска да ја предаде.
Исто така, неодамна беше спроведено истражување кое покажа дека 85 отсто од жителите на Гренланд изјавиле дека не сакаат островот да им припаѓа на САД.
