Прекинот на огнот во Газа започнува утре, израелската влада го одобри договорот

По 15 месеци војна, десетици илјади изгубени животи, уништување и голема хуманитарна криза, договорот за прекин на огнот меѓу Израел и Палестина ќе стапи на сила во недела наутро, на 19 јануари.

Беше предвидено да се одвива во три фази, кои меѓу другото вклучуваат шестнеделен прекин на огнот, размена на заложници и заробеници и целосно повлекување на израелските војници од Газа.

Во соопштението на израелската армија се наведува дека во тек се подготовки за прием на заложниците и обезбедување соодветна физичка и психолошка поддршка.

„Вооружените сили ќе продолжат да дејствуваат за да се осигура безбедноста на Израелците во областите во близина на Појасот Газа“, се додава.

Катар, заедно со Америка и Египет, одигра клучна улога во посредувањето меѓу Израел и Хамас.

Министерството за надворешни работи на Катар ги советува сите жители да „преземат мерки на претпазливост, да бидат внимателни и да чекаат инструкции од официјални извори“.

По неколкудневна неизвесност и повеќечасовна дискусија за примирјето, 24 министри во израелската влада гласаа за примирјето, а осум беа против.

Двајцата десничарски министри, Итамар Бен Гвир и Безалел Смотрич, кои се противат на договорот, најавија претходно дека ќе поднесат оставки во знак на протест поради договорот.

Сепак, тие посочија дека нема да и се придружат на опозицијата во соборувањето на владата доколку војната продолжи за шест недели, кога ќе биде завршена првата фаза од договорот за прекин на огнот и кога ќе бидат ослободени заложниците.

Многу Палестинци и семејства на израелски заложници ја прославија веста за прекинот на огнот кога за прв пат беше објавен.