Пратениците го отворија патот за Сејф сити: Ќе има казни, одземање дозволи, па дури и затвор!
Пратениците изгласаа пакет закони што ќе овозможи целосно функционирање на системот „Безбеден град“, јавува Вечер.мк. Законот за возила, Законот за полиција, Законот за извршување санкции и Законот за безбедност на сообраќајот се веќе усвоени, додека измените во Законот за прекршоци сè уште се разгледуваат во второ читање. Покрај тоа, предложени се и измени во Кривичниот законик за усогласување со новиот систем „Safe city“.
Според новите законски решенија, целата постапка за санкционирање на сообраќајните прекршоци е детално уредена – од констатирањето на прекршокот до изрекувањето на најстрогите мерки. Возачите што трипати ќе добијат правосилна забрана за управување со возило од иста категорија во рок од четири години ќе останат без возачка дозвола, а судот ќе ја одземе дозволата и ќе ги спречи да полагаат повторно најмалку една година. По одлуката, МВР ќе ги извести возачите преку СМС и имејл дека дозволата им престанува да важи за осум дена. Забраната што ја изрекува судот може да трае од еден месец до една година, а податоците за изречените мерки ќе бидат достапни и на граничните служби. Во случај на странци со странска возачка дозвола, тие нема да можат да управуваат возило на територијата на земјава и ќе биде известена граничната полиција.
Законските измени го уредуваат и системот на негативни поени и задолжуваат сопствениците на возила да ги ажурираат телефонските броеви и имејл адресите во рок од три дена од промена, во спротивно предвидена е глоба од 100 евра. Слични санкции се предвидени и за фирмите, во зависност од нивната големина.
Според Законот за безбедност на сообраќајот, воведена е толеранција при мерењето на брзината, при што од измерената вредност се одзема маргината на грешка на уредот, иако конкретната вредност не е наведена. Новите правила ја забрануваат употребата на возило под дејство на опојни дроги и психотропни супстанции, а автошколите добиваат дополнителни обврски – кандидатите за инструктори, предавачи и испитувачи ќе полагаат стручни испити пред комисија на МВР. Исто така, се воведуваат „зона училиште“ и „зона 30“ за смирен сообраќај.
Измените во Кривичниот законик предвидуваат задолжителна забрана за возење за тешки дела во сообраќајот – од шест месеци до десет години. Судот, наместо можност, сега е обврзан да ја изрече забраната, а исто така му се овозможува и одземање на возилото од сторителот доколку претходно бил осуден за кривично дело против безбедноста на јавниот сообраќај и сторил прекршок како „загрозување на безбедноста на сообраќајот“, „безобѕирно управување со моторно возило“ или возење со значително надминување на дозволената брзина.
Учесниците во сообраќајот што ќе управуваат со возило со алкохол над 1,5 промили, под дејство на дроги, психотропни супстанции или прекурсори, ќе возат во спротивна насока, ќе претекнуваат на непрегледно место или ќе ја надминуваат дозволената брзина значително, ќе се соочат со казна затвор од 3 месеци до 3 години, како и со парична казна. Исто така, казна се предвидува за учесници во недозволени трки, како и за оние што управуваат без положен возачки испит или без важечка возачка дозвола.
„Сторителите на сообраќајни прекршоци ќе добиваат известување преку СМС и имејл со записник и фотографија, а доколку казната ја платат во првите осум дена, ќе платат само половина“, пишува Вечер.мк, додавајќи дека со новите измени, системот „Безбеден град“ од 1 февруари ќе профункционира целосно, овозможувајќи побрзо и поефикасно спроведување на законските мерки и зголемена безбедност на патиштата.
Извор: Вечер.мк
