Повредени мигранти во сообраќајка на регионалниот пат Гевгелија-Богданци
Тројца мигранти од Сирија се пронајдени повредени во две напуштени возила кои учествувале во сообраќајна незгода на регионалниот пат Гевгелија-Богданци.
– На регионалниот пат Гевгелија – Богданци, вчера околу 14:45 часот, полициски службеници од Полициската станица за граничен премин и граничен надзор „Богородица“ при Регионалниот центар за гранични работи Југ, при извршување на полициски активности, во близина на две напуштени патнички возила, „алфа ромео“ со велешки регистарски ознаки и „форд“ со скопски регистарски ознаки, што претходно учествувале во сообраќајна незгода, биле пронајдени три лица, илегални мигранти од Сирија, со повреди од сообраќајната незгода, информираат од МВР.
На лицата им е укажана лекарска помош по што се сместени во Прифатно-транзитен центар „Винојуг“ – Гевгелија.
Увид на местото на несреќата извршила екипа од Полициската станица Гевгелија и се преземаат мерки за расчистување на случајот.
