ПОВЕЌЕ ЕНЕРГИЈА ОД ВЕТЕР И СОНЦЕ ОТКОЛКУ ОД ФОСИЛНИ ГОРИВА: успева планот на Европската унија
Во првата половина од годината, за прв пат, 13 земји од Европската унија успеаја да произведат повеќе електрична енергија со помош на ветер и сонце отколку од јаглен, нафта и гас.
Ветерните електрани и соларните инсталации за првпат ги надминаа фосилните горива во производството на електрична енергија во Европската унија, се вели во извештајот на организацијата Ember за првите шест месеци од 2024 година.
На крајот на првата половина од годината, уделот на турбините на ветер и соларните панели во производството на електрична енергија во ЕУ беше 30 отсто, или 385,6 терават-часови (TWh), додека 343,5 TWh беа добиени од фосилни горива.
Во првата половина од годината, 13 земји од Европската унија за прв пат успеаја да произведат повеќе електрична енергија со помош на ветер и Сонце отколку од јаглен, нафта и гас, меѓу нив Германија, Белгија, Холандија и Унгарија.
Намален удел на фосилни горива
Според извештајот, електраните во Европската унија согорувале 24 отсто помалку јаглен и 14 отсто помалку гас во споредба со првата половина на 2023 година.
Уделот на фосилните горива во производството на електрична енергија истовремено е намален од 33 на 27 проценти.
Обемот на произведена електрична енергија во европските хидроцентрали е зголемен за 21 отсто во однос на лани.
Сите обновливи извори, односно енергијата на ветерот, сончевата енергија и хидроенергијата, сега сочинуваат 50 отсто од вкупното снабдување со електрична енергија на ЕУ, пренесува „Алџезеира“.
