Постојат ли огласи за вработување на кои никој не се пријавува?
Од приватните
агенции за посредување при вработување велат дека има огласи за работа на кои не се
пријавува ниту еден кандидат или по реобјавување се јавуваат 2-3
луѓе, кои не ги поседуваат соодветните компетенции.
Ова особено се
однесува за дефицитарните професии. Од агенциите објаснуваат дека одливот на
работа сила надвор од Македонија доведе до ваква состојба и веруваат дека ќе
биде и полошо. Занаетчии, келнери, возачи на камиони, шивачи, оџачари тешко се
наоѓаат.
„Се сеќавам дека
имаше оглас за столар во фабрика за мебел и ми кажаа дека никој не се пријавил.
Занаетите се дефицитарни и навистина е тешко да се најде занаетчија од типот на
градежник, ѕидар, плочкар. Сега знаеме дека во странство ќе почне летната
туристичка сезона, а многу работници заминаа таму и тоа ја прави ситуацијата
уште полоша. Последниве години се чувствуваат тие примени. Квалитетниот кадар
кој останува овде е минимален. Работниците или не се доволно компетентни или се
прескапи. Работодавачот ако се најде во таква ситуација мора да го одбере
„помалото зло“, ако можеме така да кажеме. Дури се случува на некои огласи да
се јават луѓе кои немаат соодветни квалификации, но сакаат да пробаат дали
можат да работат одредена работа“, раскажува Донка Спасовска, сопственичка на
агенцијата „Хоризонт“.
Од друга скопска
агенција велат дека има огласи за вработување за кои нема интерес. Ако се
работи за помала општина, шансите да се најде соодветен работник се мали.
„Има такви огласи
и по некое време нема пријавени апликанти. Тешко наоѓаат возачи на камиони со Ц
категорија. Истото важи и за некои специфични струки каде се бара поседување на
соодветни лиценци, но и за келнери има проблем. Ако се потребни работници за
изградба на автопат, во една општина ги нема, па мораат да обезбедат луѓе за
работа од друг град. Доколку се бараат градежници за во помал град, оние кои се
занимаваат со таа работа веќе се вработени и е тешко да се најде работник“,
додаваат од скопска агенција.
Но, од агенциите велат дека кандидатите одлучуваат каде ќе аплицираат врз основа на
реномето на одредена компанија, висината на платата исто ја земаат предвид ако
е наведена и дали работното место е блиску до нивниот дом.
Нашите
соговорници велат дека за работа во државен сектор има голем интерес. На веб страницата
на Агенцијата за вработување вчера имаше над 8.000 слободни работни места.
Сања Атанасовска
foto freepik.com
