ПОЧНА БЕРБАТА НА ЈАБОЛКА ВО ПРЕСПА: Работниците бараат и по 2.200 денари дневница, но не сите овоштари се во можност да платат толку
Од 1.500 денари
до 2.000 или 2.200 денари се движат дневниците во Преспа за берба на јаболка.
Некои од овоштарите на работниците им нудат сместување и три оброци дневно и
тоа ја одредува висината на дневницата. Двете страни се договараат и за
превозот. Тоа е работа на договор меѓу овоштарот и работниците.
Еден работник во
просек дневно треба да собере 35 до 40 гајби со јаболка.
„Кога зборуваме
за рентабилност, низа на години и оваа не сме рентабилни во суштина. Се работи
да се преживее година за година. Има
намалување како на површината, така и на бројот на овоштарите. Некои се откажуваат,
во неможност да обезбедат рентабилност или во крајна мера ги одржуваат овошните
насади со одредена заштита, колку да произведат индустриско јаболко, а трпезното
јаболко е минимално. Втората работа е што веќе од пред една или два години
бројот на работници се намалува, се активираат сопствените ресурси по
семејства, роднини, пријатели, од други градови за да се реализира бербата. Таа
дневница која се споменува не можат да ја исплатат дел од овоштарите. Оние
овоштари на кои овоштарството им е дополнителна дејност, ако се две – три лица
вработени во администрација или во која било дејност, фабрика, за нив не
претставува проблем да платат. Тука имаме нерамноправност на оние на кои
овоштарството им е основна дејност и тешко дека ќе можат да продолжат во
иднина“, вели Љубе
Пампулески од
Здружението на овоштари „Благој А.Котларовски“ од Ресен.
Работници доаѓаат од соседните општини, а има и одредена категорија на луѓе кои можат во
октомври да користат неплатен одмор за да одат на берба на јаболка или станува
збор за пензионери кои можат да работат.
Притисок прави
прави и времето, затоа што имавме суша, па врнежи. Не се знае дали времето ќе
им оди во прилог на овоштарите во октомври. Ако има осцилации, тоа нема да им
одговара.
Неколку илјади
работници се потребни во Преспа за берба на јаболката. Пампулески објаснува дека делумно бербата е
почната, поради порана зрелост на јаболката, но тоа се 10 до 20 отсто, а за
недела дена бербата ќе се интензивира и сите ќе бидат во овоштарниците.
Се очекува да има
околу 60.000 до 70.000 тони трпезно јаболко и 20.000 до 30.000 тони индустриско
јаболко. Од низа фактори, а пред сè од температурните разлики, тешко е точно да се предвиди количината на јаболката
која сезонава ќе биде собрана.
Сања Атанасовска
foto freepik.com
