Побрзото одење е здраво за срцето
Доколку сакате да си го подобрите здравјето, тоа може да се направи со едноставни и мали промени. Имено, одењето со побрзо темпо би можело да ја намали опасноста од широк спектар на проблеми со срцевиот ритам, посочува истражувањето објавено во „БМЈ харт“ (BMJ Heart).
Истражувањето ги опфатило податоците од 420.925 учесници во „Биобанката на Обединетото Кралство“ (UK Biobank), кои дале податоци за брзината на одење. Според наводите, нешто повеќе од 6,5 отсто од учесниците имале бавно темпо на одење, 53 отсто – просечно одење и 41 отсто пројавиле брзо темпо. Во просек, за 13 години, 36.574 учесници (9 отсто од испитаниците) развиле некаква абнормалност на срцевиот ритам.
Пресметките, инаку, говорат дека просечно или брзо одење е поврзано со 35 отсто и 43 отсто помала опасност од сите абнормалности на срцевиот ритам – соодветно, во споредба со бавното темпо на одење.
Бавното темпо, од една страна, не е поврзано со опасноста од развој на абнормалности на срцевиот ритам, а од друга страна, повеќе време во одење со просечно или брзо темпо значи 27 отсто помал ризик. Атријалната фибрилација е состојба во која горните комори на срцето чукаат неправилно и пребрзо. А, пак, вентрикуларните аритмии се јавуваат кога абнормалниот срцев ритам почнува во долните комори.
Проблемите со срцевиот ритам може да ја зголемат и опасноста од мозочен удар, срцева слабост и срцев удар доколку не се лекуваат. Истражувачите забележаа дека истражувањето е само набљудувачко, што значи дека не може да се извлечат цврсти заклучоци за тоа дали брзото одење е директна причина за абнормалности на срцевиот ритам.
Овој научен труд е прв што ја истражува поврзаноста меѓу темпото на одење и аритмиите и покажува дека метаболичките и воспалителните фактори може да имаат негативна улога во тоа. Поточно, побрзото одење го намалува ризикот од дебелина и воспаление, што, пак, го намалува ризикот од аритмија.
„Ова откритие е биолошки веродостојно бидејќи кумулативните епидемиолошки испитувања покажаа дека темпото на одење е обратно поврзано со метаболичките фактори како што се дебелината, ‘ХбА1ц’ (гликоза на гладно), дијабетес и висок крвен притисок, коишто се поврзани со ризикот од аритмии“, велат истражувачите, предводени од професорката Џил Пел од Универзитетот Гласгов.
Просечната возраст на испитаниците е 55 години, од кои 55 отсто биле жени, а 97 отсто биле белци.
Демографските фактори и животниот стил земени предвид во испитувањата говорат дека учесниците кои пријавиле побрзо темпо на одење – поверојатно е да бидат мажи, да живеат во помалку обесправени области и да имаат поздрав начин на живот.
