По загубата од поплавите колегите од Малешевијата застанаа зад Никола и му донираа овци!
Солидарноста меѓу сточарите повторно излезе на површина откако дел од колегите решија да му помогнат на свој пријател и колега кој претрпел штети од поплавите во струмичкиот регион.
Сточарот Александар Мачевски преку објава на социјалните мрежи информира дека заедно со други колеги се организирале за да му излезат во пресрет на Никола Колев, кој во поплавите изгубил дел од своето стадо овци.
Во иницијативата се вклучил и сточарот Зоран Чучуковски од Пехчево, а, како што посочуваат, ваквиот гест е доказ дека и понатаму постои човечност и подготвеност за меѓусебна поддршка.
„Секој којшто ќе биде во можност и со желба да му даде поддршка на Никола, го повикуваме да го стори тоа – за некого е ситница, за него во овие тешки моменти претставува многу“, стои во објавата.
Иницијативата претставува апел до пошироката јавност да се вклучи и да помогне во надминување на последиците од поплавите, кои оставија значителни штети кај дел од сточарите во регионот.
