По апанажата, назад во угостителството: Лазе Таневски повторно управува со охридските хотели „Лаки“ и „Десарет“
Бизнисменот и поранешен пратеник Лазе Таневски се врати на чело на охридските хотели што ги менаџира, една година по истекот на неговиот мандат во Собранието и завршувањето на законски доделената апанажа. Како што објави Фактор, Таневски повторно е управител на хотелите „Лаки“ и „Десарет“ на охридското крајбрежје, преку компанијата „Теди Комерц“, заменувајќи ја Билјана Таневска.
Хотелот „Лаки и спа“ е препознатлив како еден од најлуксузните објекти во Охрид со отворен бар и базен, додека хотелот „Десарет“ во Пештани е во сопственост на акционерското друштво „ОхридТурист“, но се издава под закуп на компанијата на Таневски.
Таневски, кој беше претседател на СДСМ Охрид од 2017 година, во Собранието влезе како претприемач од приватниот сектор, за разлика од поголемиот дел од пратениците кои доаѓаат од јавната администрација. Мандатот му заврши во мај 2023 година, по што во текот на цела една година ја користеше апанажата, законско право на поранешни пратеници да добиваат плата од Собранието во висина од околу 2.000 евра месечно.
Како што потсетува Фактор, покрај Таневски, апанажа добиле уште 35 поранешни пратеници, меѓу кои се Арбен Зибери, Љатифе Шиковска, Енес Ибраим, Снежана Калевска Ванчевска, Маја Морачанин, Дарко Каевски, Жаклина Лазаревска и други.
Во текот на својата политичка кариера, Таневски беше предмет на критики од тогашната опозиција, која тврдеше дека тој ја користел партиската функција за вработување на блиски членови на семејството. Сепак, како што забележува Фактор, му се признава фактот дека во Собранието дошол од реалниот сектор.
