Петровска: Се гордееме кога ги слушаме пораките од Столтенберг дека припадниците на македонската Армија рамноправно со сојузниците придонесуваат за меѓународниот мир и безбедност
Во вечерашното интервју за МТВ министерката Петровска потенцираше дека е многу горда што припадниците на македонската Армија во мисиите во кои се вклучени го даваат својот максимум и се однесуваат многу професионално.
“Неодамна имав и една посета и во Бугарија и во Романија каде што навистина оценките од командантите на тие единици беа одлични за нашите припадници, истото тоа е и случајот со војниците во рамките на КФОР мисијата во Косово, меѓутоа се разбира и нашето присуство во БиХ. Важно е што Република Северна Македонија, е препознаена како земја која допринесува за регионалниот мир и безбедност и еден од начините тоа да го направиме е преку учеството во овие мисии. Неодамна ја донесовме одлуката за зголемување на нашето присуство во Косово и се разбира и во Косово и БиХ ќе останеме се додека тоа е потребно и ќе им помогнеме на нашите пријатели и од Косово и од БиХ меѓутоа и од регионот да всушност го изодат патот за европска и евроатлантска интеграција” рече Петровска.
Во контекст на патот кон европската интеграција кој не е завршен и за Северна Македонија, Петровска упати порака до политичките субјекти, особено после денешното обраќање на Генералниот секретар во Собранието, да ја разберат важноста од носењето на политички одлуки кои после неколку години ќе бидеме горди дека сме ги донеле.
“Во 2018 година не беше лесно да се потпише Преспанскиот договор и да се донесе една од можеби најтешките политички одлуки во нашата историја меѓутоа денес сите ние се гордееме кога ги слушаме овие пораки, особено пораките дека припадниците на македонската Армија рамноправни учествуваат со припадниците на сојузничките сили насекаде во светот, тоа го оправдува секој еден влог кој како што граѓани сме го дале и сме го направиле во поглед на нашето пристапување во НАТО Алијансата” порача министерката.
“За Владата, за мене лично како министерка и пред се како граѓанин на оваа држава Европската интеграција на мојата земја нема алтернатива” рече Петровска во интервју за МТВ.
