Петковиќ: Специјалците на Курти со долги цевки, оклопни возила го окупираа северот на Митровица
Во северниот дел на Косовска Митровица имало вистинска воена опсада, вели директорот на Канцеларијата за Косово и Метохија, Петар Петковиќ, јави дописничката на МИА од Белград. Тој рече дека српските власти не гледаат начин за продолжување на дијалогот.
„Специјалците на Курти со долги цевки, оклопни возила го окупираа северот на Митровица, дојдоа од јужниот дел на Митровица со над 30 оклопни возила, под маски, со долги цевки. Ја малтретираа цела северна Митровица, создадоа безбедносен обрач, патролираа во центарот на градот, имаа свои контролни пунктови на периферијата на градот, запираа автомобили, ги претресуваа луѓето, ги удираа со пиштоли и пцуеле, се обидеа да уапсат неколкумина“, рече Петковиќ.
Тој кажа дека косовскиот премиер Албин Курти постојано провоцира и дека цело време сака да започне конфликти и војна.
„Шокирани сме од најавите на САД и Британија, во кои не знам што се бара од Србија, да ги ослободи уапсените таканаречени полицајци, а никој не спомнува дека е неопходно да се ослободат невините Срби. Гледате за какво лицемерие зборуваме. Ние не одлучуваме кога треба да се ослободат полицајците, ние сме правна држава за тоа одлучува обвинителството и судот“, вели Петковиќ.
Во Лепосавиќ граѓаните вчера нападнаа новинарка екипа и ја искршија нивната камера.
Со недели има тензии на Косово. Србите ги бојкотираа локалните избори и не ги признаваат за легитимни градоначалниците Албанци. Србите бараат косовските специјалци да се повлечат од северот и да се формира Заедницата на српски општини(СЗО).
