Пералницата на Клинички центар „Мајка Тереза“ во колапс – работниците без плата, машините нефункционални
Пералницата на Клиничкиот центар „Мајка Тереза“ во Скопје не работи, а состојбата е алармантна. Според „Слободен печат“, вработените со месеци немаат земено плата, машините се нефункционални, а ниту една клиника од комплексот не ја предава болничката облека во овој супстандарден објект.
Објектот е урнисан, со оштетени ѕидови и кров, протекува вода, а текстилот се чува со натрупување во купови на подот. Машините за перење и сушење се стари со децении, па дел од вработените дури и се повредувале при обиди да ги поправат.
Од Министерството за здравство за „Слободен печат“ потврдиле дека фирмата „Скопстер“ поднела барање пералницата да премине во владение на Службата за општи и заеднички работи при Клиничкиот центар.
– „Поради изборите во моментот не може да се отвораат постапки за јавни набавки, па проблемот ќе се решава по завршувањето на изборите. Во меѓувреме, дел од обврските се покриваат со локални пералници и соработката со ГОБ ‘8 Септември’“, рекоа од Министерството.
„Скопстер“ тврди дека неможноста навремено да исплаќа плати произлегува од тоа што Заедничките служби ненавремено ги исплаќале долговите. Вработените, пак, за „Слободен печат“ изјавиле дека не се здравствено осигурани, не им тече стажот и се одјавени.
Државниот санитарен и здравствен инспекторат потврдил дека пералницата е во крајно лоша санитарно-техничка состојба и издавал решенија за отстранување на недостатоци. Но, поради тоа што објектот е единствен од овој вид, не е издадена забрана за работа.
Инаку, „Скопстер“ во 2019 година склучи договор за јавно-приватно партнерство за стерилизација на хируршки инструменти, но проектот со години не е реализиран. Единствената инвестиција досега е направена во „Мајчин Дом“, каде што се вложени 12 милиони евра во современа апаратура, но другите три предвидени локации никогаш не почнале со работа.
Државниот завод за ревизија во април годинава констатираше дека јавно-приватните партнерства не обезбедуваат ефикасни јавни услуги, а конкретниот проект за стерилизација останува нереализиран. Ревизорите предупредуваат дека доколку не се најде решение, ќе има ризик од штети и за институциите и за граѓаните.
