Отворена телефонската линија за повредените од трагедијата во Кочани
Од денеска е достапна телефонска линија за сите повредени и нивните семејства во трагедијата што се случи во дискотеката „Пулс“ во Кочани, информираат од Владата. Линијата ќе овозможи директна комуникација со институциите, при што граѓаните ќе можат да ги изразат своите барања, потреби и предлози.
Телефонскиот број 070/355-526 е јавно достапен и ќе биде управуван од Канцеларијата на претседателот на Владата. „Никој нема да биде заборавен. Наш приоритет е повредените да добијат соодветна медицинска нега и целосна рехабилитација, за да можат да продолжат со животот понатаму“, се вели во владиното соопштение.
Како дел од институционалниот одговор, Владата најавува дека на наредната седница ќе донесе одлука со која одморалиштето Пониква, во сопственост на Министерството за внатрешни работи, ќе се отстапи за потребите на Министерството за здравство. Таму ќе бидат сместени пациенти кои се веќе во стабилна состојба, но имаат потреба од понатамошен медицински третман и рехабилитација.
Објектот располага со 27 соби и 56 легла, а ќе биде дополнително екипиран со медицински персонал за да обезбеди целосна грижа. Владата уверува дека е целосно посветена на здравствената заштита на сите повредени во трагедијата.
Во соопштението се упатува и апел до политичките партии да се воздржат од „политичка некрофилија“ и да дозволат институциите професионално да го водат случајот.
„Секој што е инволвиран во овој случај ќе одговара, без разлика на неговиот општествен статус или политичка припадност. Правдата доаѓа – и ќе биде одговор за сите. Државата е на патот на промените“, нагласуваат од Владата.
