Ѓорѓиевски : Инспекциите се превенција, а не казна, нема компромис со безбедноста на граѓаните!
Денес се одржа управен одбор на ЗЕЛС, на кој присуствуваа и градоначалници од поголемите општини во државата. Како што беше најавено, темата на состанокот беа вонредните инспекции на објектите од јавен карактер кои се спроведоа во изминатите денови. Претседателот на ЗЕЛС, Орце Ѓорѓиевски, изјави дека по извршените контроли на училиштата, градинките, јавните установи, културните домови и спортските сали, може да се констатира дека тие се безбедни и граѓаните можат да бидат спокојни. Инспекциите ќе продолжат и во наредниот период, не само во делот на градинките и училиштата, туку ќе се направат строги контроли и во станбените згради, како и на целата урбана опрема во рамките на општините.
– Како што беше заклучено и на Управниот одбор на ЗЕЛС, по извршените контроли на сите училишта, градинки, јавни установи, културни домови и спортски сали, можеме да потврдиме дека овие објекти се безбедни и граѓаните можат да бидат спокојни. Инспекциите ќе продолжат и во наредниот период, опфаќајќи не само јавни објекти, туку и станбени згради и урбана опрема во општините, со меѓуопштинска соработка каде што е потребно, за да се осигури дека секој објект е безбеден-Истакна Претседателот на ЗЕЛС Ѓорѓиевски.
Подвлече дека во координација со колегите градоначалници е утврдено дека во некои општини недостасуваат инспектори. Овој предизвик ќе биде надминат преку меѓуопштинска соработка, со цел да се провери секој објект во државата и да се обезбеди максимална безбедност. Освен тоа, беше донесена препорака до сите општини, училиштата и јавните установи да ги откажат планираните јавни настани или да најдат соодветна замена за нив. Еден од предлозите е да се засадат дрвца во чест на младите лица кои трагично ги загубија животите, како симбол на почит и сеќавање, додаде Ѓорѓиевски.
-Јас знам дека ова е исклучително сензитивен период за сите нас како народ во оваа земја, но мораме да порачаме дека граѓаните треба да веруваат во нас како институции. Да веруваат во локалната самоуправа, бидејќи ние сме дел од групата на градоначалници кои што заедно ќе ги направат промените во овој систем-изјави Претседателот на ЗЕЛС.
Во поглед на обемноста на инспекциите и прашањата зошто вакви контроли не биле направени порано, Ѓорѓиевски нагласи дека впечатокот е едно, а реалноста сосема друго. Тој потенцираше дека контроли во училиштата и градинките биле спроведувани и претходно, но за нив јавноста можеби не била доволно информирана. Како пример, тој ја посочи Општина Кисела Вода, каде на крајот од 2024 година биле проверени сите училишта, градинки и културни домови. Дополнително, вонредните инспекциски контроли во моментов ги вршат инспектори од локалната самоуправа во соработка со инспектори од централните институции, вклучително и Дирекцијата за заштита и спасување, кои проверуваат дали во објектите има исправни противпожарни апарати, хидранти и дали персоналот е обучен за нивно користење.
Во однос на законската регулатива и можноста за нејзино унапредување, Ѓорѓиевски истакна дека законите се недопрецизирани и дека во многу случаи постојат правни недоречености кои не се решени со децении. Тој најави формирање на работна група која ќе подготви унифициран правилник за поставување урбана опрема, со цел да се создадат исти стандарди за сите општини. Доколку се утврди дека се потребни законски измени за поголема ефикасност на контролите, ЗЕЛС ќе побара интервенции од законодавецот.
За тоа какви неправилности биле утврдени при контролите, претседателот на ЗЕЛС истакна дека најголемиот проблем генерално во државата е урбаната опрема поставена во минатото, особено кај угостителските објекти. На многу места се затекнати неправилности и на сите им е укажано на роковите во кои тие мора да бидат отстранети. Дополнително, Ѓорѓиевски нагласи дека во тек е постојана комуникација со Владата и со претседателот на Владата, бидејќи институциите мора да делуваат заеднички за да се обезбеди максимална безбедност и системско решение за овие проблеми. Тој подвлече дека ова е сензитивен период за целата држава, но граѓаните треба да веруваат во институциите и во локалната самоуправа, која со одговорност работи на подобрување на безбедноста во секој сегмент од јавниот живот.
