Одамна немало толку публика: Пет илјади навивачи ги „искинаа“ гласните жици за МЗТ (ФОТОГАЛЕРИЈА)

14/04/2023

Ако во веќе подалечното минато редовно бевме сведоци на спектакли на кошаркарските натпревари во Македонија, последнава деценија нѐ навикна на следење дуели пред едвај неколку стотици најверни фанови, поради што вечерашниот меч на МЗТ против Цибона пред речиси полна сала беше пријатно освежување од сивилото.

Без разлика на празничниот викенд и играњето на Велики петок, скоро 5.000 вљубеници во кошарката се најдоа на трибините во „Јане Сандански“ со една единствена цел – да им помогнат на „металците“ да дојдат до посакуваната победа. Атмосферата беше фантастична, навивањето громогласно, а најверните и најбучни „Фемили“ често имаа поддршка од останатиот „обичен“ дел од фановите, кои понесени од случувањата на теренот стануваа и пееја буквално во еден глас.

Сино-белите дојдоа до посакуваниот триумф, што беше прв чекор кон избегнување на последното место во АБА, но за да дојдат до посакуваниот бараж потребно им е и Будуќност да го совлада нивниот директен ривал Борац Чачак. Овој меч се игра утре во Подгорица (19 часот).