Од утре стартува системот „Сејф Сити“
Од утре официјално започнува со работа системот „Сејф Сити“, новиот автоматизиран механизам за контрола и унапредување на безбедноста во сообраќајот. Од Министерството за внатрешни работи информираат дека системот е целосно тестиран и подготвен за примена на терен, со цел намалување на сообраќајните прекршоци и зголемување на безбедноста на патиштата.
Според податоците на МВР, дневно над 100 граѓани ги ажурирале своите лични податоци, што претставува законска обврска за сите возачи. Надлежните апелираат граѓаните навремено да ги усогласат своите податоци, бидејќи сите прекршоци ќе се евидентираат автоматски преку системот.
„Сејф Сити“ ќе регистрира низа сообраќајни прекршоци, меѓу кои пречекорување на дозволената брзина, минување на црвено светло, управување со возило со истечена регистрација, како и непрописно паркирање. За овие прекршоци се предвидени казни во износ од 15 до 500 евра, во зависност од тежината на сторениот прекршок.
Од МВР појаснуваат дека казните платени во рок од осум дена ќе бидат намалени за 50 отсто, додека по истекот на тој рок ќе се наплатува целосниот износ. На овој начин, како што велат надлежните, се стимулира навремено постапување и поголема дисциплина кај учесниците во сообраќајот.
Покрај фиксните камери, најавено е и ангажирање полициски возила опремени со мобилни камери, кои ќе патролираат низ државата и ќе вршат дополнителен надзор на сообраќајот.
Надлежните институции очекуваат дека со воведувањето на „Сејф Сити“ ќе се подобри сообраќајната култура, ќе се намали бројот на сообраќајни незгоди и ќе се зголеми безбедноста на патиштата низ целата држава.
