Од понеделник нема да возат автобусите на ЈСП – ако немаат плата попладне, нема автобуси ни во вторник!
Поради неисплатена плата за декември, автобусите на ЈСП од понеделник нема да возат.
Претседателот на Синдикатот на ЈСП Миќо Стојановски истакна дека тие ќе останат на својата одлука дека нема да има јавен превоз в понеделник.
Инаку, за понеделник има закажана и вонредна седницата на Советот на Градот, на која како единствена точка на дневен ред, се субвенциите од 11 милиони евра за претпријатието.
Сепак, како што вели, за можноста во понеделник изутрина да биде пуштен по еден автобус на сите линии, за превоз на учениците, бидејќи стартува второто полугодие од учебната година, тоа ќе биде разгледано утре.
„Утрото во понеделник во 4:30 часот ниту еден автобус нема да излезе од базите на претпријатието. Ако им беше битно на 45-те советници на Град Скопје да донесат одлука за субвенциите за ЈСП, тоа можеа да го сторат и вчера и денеска. Ние бараме плата за декември и редовна исплата на платите за 2024 година“, дециден е Стојановски.
Прашан доколку во понеделник се донесе одлуката за субвенции на седницата на Советот на Град Скопје, дали истиот ден ќе биде воспоставен повторно јавниот превоз, тој посочува дека и доколку се донесе таа одлука, нејасна е процедурата оти не се знае кога ќе биде исплатена плата.
„Доколку одлуката се донесе во понеделник во разумно време, за парите да можат да легнат на сметката на претпријатието, во вторник ќе има јавен превоз. Во спротивно, автобусите на ЈСП нема да возат ниту во вторник“, вели тој.
