Обвинителен акт и проширување на истражна постапка за уште шест лица во предметот „Исар“

По неколку месечна истражна постапка, јавен обвинител од Основното јавно обвинителство за гонење на организиран криминал и корупција до Основниот кривичен суд Скопје поднесе Обвинителен акт против единаесет лица. Според опишаните дејствија во диспозитивот на обвинението на обвинетите им се става на товар дека сториле кривично дело Организирање на група и поттикнување на извршување на делата трговија со луѓе, трговија со дете и криумчарење на мигранти од член 418-в и, додека шест лица се обвинети и за кривично дело – Криумчарење на мигранти од член 418-б од КЗ.

Истражната постапка беше отворена на почетокот на месец јуни како резултат на криминалистичка истрага „Исар“ која се спроведуваше над 17- члена група – дел од меѓународен канал за криумчарење на мигранти. Со тогашната акција е сузбиена меѓународна криминална група која во периодот од месец јули 2021 до мај 2023 година, врз основа на претходен договор со лица од Србија, Бугарија, Унгарија и РСМ се занимавала со организирање на криумчарење на мигранти од територијата на Р.Грција кон Р.Унгарија и од Р.Бугарија кон Р.Србија, со крајна дестинација во земјите на ЕУ.

Според сознанијата од истрагата лице – организатор по потекло од Ирак, со германски патни документи, кој во моментов е на отслужување на казна затвор во С.Р.Германија за кривични дела поврзани со недозволена трговија со дрога, заедно со две лица спрема кои е донесена Пресуда врз основа на предлог спогодба и тројцата првообвинети, со умисла и од користољубие, создале и организирале група за вршење на кривично дело Криумчарење на мигранти од чл.418-б од КЗ. Функционирајќи преку лични средби, како и преку воспоставен телефонски начин на комуникација или преку интернет комуникација, припадници на организираната криминална група станале и останатите обвинети и уште две лица кои во текот на истражната постапка се спогодиле со обвинителството.

Откако Ирачанецот по претходна комуникација со организаторите од РСМ, ќе договорел прифаќање и превезување на илегални мигранти на територијата на Бугарија и Унгарија, преку брз трансфер на пари РИА“ и „Western Union“ испратени преку лица посредници од Турција или лично на рака вршел трансфер на пари кон двајцата осудени организатори од РСМ. Овие парични средства биле наменети за за трошоци за изнајмување на возила, патни трошоци, патарини и гориво, по што тие се договарале со останатите организатори – тројцата првообвинети како да прифатат и превезат илегални мигранти и да купат или да обезбедат возила од различни Рент-а кар агенции од Скопје, Куманово, Тетово и од Р.Бугарија. Потоа ги ангажирале членовите на групата со задача да бидат возачи или „чистачи на патот“ . Насоките и локацијата им била испраќана преку апликациите „Whats Up“, „Viber“ и „Messenger“ или преку лични средби на претходно договорени локации во Србија и Унгарија. По што членовите прифаќале и превезувале илегални мигранти. Повремено биле ангажирани и други лица како возачи, за што обвинетите како организатори во зависност од бројот на криумчарени мигранти или државата преку чија територија биле криумчарени мигрантите, за успешно извршеното криумчарење им исплаќале износ од 2.000 до 4.000 евра.

Врз основа на активностите во текот на истражната постапка се откриени уште шест припадници на оваа организирана група против кои јавниот обвинител донесе Наредба за спроведување на истражна постапка. Осомничените од месец август 2021 до мај 2023 година како припадници на меѓународната криминална група, заедно со организаторите обвинетите и осудените кои дел од нив биле во улога на „чистачи“, имале задача да прифатат и превезат илегални мигранти на територијата на Р.Бугарија и Р.Унгарија,. По успешното извршено криумчарење на мигранти, во зависност од земјата во која требало да го вршат прифаќањето и превезувањето на илегалните мигранти им бил исплаќан износ од 1.000 до 3.000 евра.

Како резултат на меѓународна правна помош и меѓународна полициска соработка во текот на севкупната постапка обезбедени се докази за вкупно девет кривично правни настани на територија на Р.С.Македонија, Р.Унгарија и Р.Бугарија. Во два кривично правни настани се прокриумчарени се вкупно 47 лица – илегални мигранти од Авганистан на територија Р.Бугарија. На територија на нашата држава во четири кривично правни настани се прокриумчарени 54 илегални мигранти и на територија на Р.Унгарија 39 илегални мигранти во три кривично правни настани.