Обвинение за „Пулс“ – тест за обвинителството и показател за капацитетот на државата да се справи со корупцијата
Утврдувањето на одговорност за трагичниот пожар во кочанскиот ноќен клуб „Пулс“ на 16 март 2025 година, во кој животот го загубија 62 лица, а околу 200 беа повредени, влегува во клучна фаза – поднесување на обвинение.
Во 12 часот на прес конференција ќе се појават државниот јавен обвинител Љупчо Коцевски и 13-те обвинители кои работат на рпедметот.
Истрагата, во која се вклучени 13 обвинители, досега опфати 47 физички и три правни лица, вклучувајќи сопственици и менаџери на клубот, корисници на пиротехника, како и поранешни и актуелни функционери. Првичните наоди покажаа дека причина за пожарот е несоодветна употреба на пиротехника, која предизвикала брзо ширење на огнот поради лесно запаливи материјали во таванот и ѕидовите. Дополнително, утврдено е дека објектот, кој бил поранешен магацин, немал соодветна лиценца за работа како ноќен клуб, а клучниот излез за итни случаи бил заклучен и неупотреблив, што довело до стампедо.
Обвинителството ја прошири истрагата и кон други институции, сомневајќи се дека низа функционери овозможиле клубот да работи без исполнување на условите. Меѓу осомничените се и тројца поранешни градоначалници и градежни инспектори од Општина Кочани, како и директори и инспектори од Дирекцијата за заштита и спасување, кои со години не извршиле никаква контрола врз објектот. Истрагата опфаќа и поранешни министри за економија и други функционери од тоа министерство.
Случајот доби и силна политичка димензија со приведувањето на Александар Нацев, опишан од Обвинителството како вистински сопственик на агенцијата за обезбедување „Рубикон“, која го обезбедувала клубот „Пулс“. Нацев е поранешен функционер на ВМРО-ДПМНЕ, кој според премиерот Христијан Мицкоски, извршувал функција во Владата во периодот 2016-2017 година. Мицкоски исто така потврди дека Нацев бил делегат на конгресот на кој тој бил избран за претседател на партијата. Нацев се сомничи дека вршел обезбедување без договор, не ги регистрирал безбедносните недостатоци во клубот, дозволил влез на малолетници и употреба на пиротехника.
Трагедијата во Кочани, која потсетува на слична катастрофа во клубот „Колектив“ во Букурешт во 2015 година што доведе до пад на романската влада, ги разоткри длабоките системски слабости во македонското општество.
Исходот од оваа истрага и судски постапки ќе бидат клучен показател за капацитетот на државата да се справи со корупцијата, негрижата и политичкото влијание кои ја загрозуваат безбедноста на граѓаните. Јавноста очекува целосна и неселективна правда, што претставува огромен притисок врз правосудните органи и политичките елити во земјата.
