Обрат во МРТ: Поништен конкурс за Надзорен одбор, нов се одложува поради избори
Македонската Радио Телевизија останува без Надзорен одбор откако новиот состав на Програмскиот совет ја поништи постапката за избор, која ја започна неговиот претходник. Одлуката доаѓа откако старата постапка не била завршена во законски предвидениот рок, а новиот конкурс – и покрај значењето на органот – се одложува до по завршувањето на локалните избори.
Програмскиот совет на МРТ на 10 септември донесе Одлука со која го одложува распишувањето на нов конкурс за Надзорен одбор, како и конкурсите за избор на директор и заменик директор на јавниот сервис. Причината, како што се наведува, е актуелниот изборен процес и потребата за правна усогласеност со Изборниот законик и Законот за спречување на корупцијата.
Одложувањето доаѓа откако претходно, на 18 август, Советот ја запре постапката започната од претходниот состав, со образложение дека мандатот на административната комисија истекол и таа нема овластување да ја доврши постапката. Истовремено, беше констатирано дека досегашниот рок е надминат, што отвора сомнеж во законитоста и транспарентноста на процесот.
„Со донесените одлуки се зајакнува ефикасноста и законитоста на работата на Советот“, изјави претседателот Давор Пашоски, додавајќи дека јавноста ќе биде навремено информирана кога ќе бидат создадени услови за нов конкурс.
Според законските надлежности, Надзорниот одбор има клучна улога во надгледувањето на финансиското работење и законитоста на МРТ, а неговото отсуство може да влијае врз функционирањето на јавниот сервис.
