Обновувањето на снабдувањето со струја во Португалија би можело да потрае и до седум дена
Голем прекин на електричната енергија ги зафати повеќе региони во Португалија, предизвикувајќи сериозни проблеми. Според Националната енергетска мрежа (РЕН), целосното обновување на снабдувањето со струја би можело да потрае и до седум дена, имајќи ја предвид сложеноста на настанатиот дефект.
Според компанијата, прекинот на електричната енергија бил предизвикан од дефект на шпанската електроенергетска мрежа, кој, како што е наведено, е резултат на „редок атмосферски феномен“. Во исто време, заменик-министерот за територијална кохезија, Мануел Кастро Алмеида, изрази сомневање дека станува збор за можен кибер-напад, јавува португалскиот портал „Утрински вести“ (Correio da Manhã).
– Со оглед на тековните проблеми со мрежата, прогнозата за обновување на струјата останува неодредена и може да се продолжи, се наведува во соопштението на операторот со мрежата за дистрибуција на електрична енергија во континентална Португалија.
Поради прекинот на струја затворени се супермаркети, кафулиња и ресторани, а отежнато е и користењето на платежни картички и се создадоа огромни редици на банкоматите.
Аптеките работат со проблеми или не работат, додека болниците и аеродромите преминаа на работа со генератори.
Метрото во Лисабон е во прекин, во сообраќајот владее хаос бидејќи не работат семафорите, наведува порталот.
Судовите се отворени само за итни случаи, рекол извор од Министерството за правда.
Официјалните лица предупредуваат дека прекинот на струја може да влијае на водоснабдувањето и ги повикуваат граѓаните рационално да користат вода.
Високообразовните установи ја прекинаа наставата и активностите.
Владата на Португалија соопшти дека се надева дека ситуацијата ќе се регулира во текот на денот.
