Објавена Листата на должници: УЈП ги откри неплатените долгови!
Управата за јавни приходи (УЈП) ја отвори новата година со објавување на Листата на должници бр. 01/2025. Оваа листа претставува важен документ што ги открива финансиските обврски на правните и физичките лица кои не ги подмириле своите даночни задолженија во предвидениот рок.
Листата ги опфаќа долговите доспеани до 30 септември 2024 година, а кои останале неплатени до 31 декември 2024 година. Во документот се наведени обврски по основ на данок на додадена вредност (ДДВ), данок на добивка, персонален данок на доход, придонеси од задолжително социјално осигурување, акцизи и царини.
На оваа листа се најдоа 1962 правни лица, што претставува намалување за 7 должници во споредба со претходната листа, и 3915 физички лица, што е зголемување за 69 должници.
Вкупниот нето долг кој се објавува во Листата бр. 01/2025 изнесува 11.509.677.366 денари, што е зголемување од 309.353.404 денари во однос на претходната листа.
Целосната листа на должници е достапна на веб-страницата на Управата за јавни приходи и може да се прегледа ТУКА.
