Објавена е новата состојба на повредените на парадата во Ливерпул

53-годишен маж од Западен Дерби е уапсен под сомнение за обид за убиство, опасно возење и возење под дејство на дрога, по нападот во Ливерпул, соопшти полицијата. Тој останува во притвор каде што се испитува. Во исто време, се спроведуваат обемни истраги од камерите за надзор за да се утврди движењето на Форд Галакси.

Помошничката началничка на полицијата Џени Симс потврди во име на Националната здравствена служба (NHS) дека 50 лица биле згрижени во болница по нападот. Од нив, 11 се уште се во болница. Сите се во стабилна состојба и се чини дека добро се опоравуваат.

Симс им оддаде почит на службите за итни случаи кои веднаш се упатија кон „опасната ситуација“ и беа на местото на настанот за неколку секунди.

Се верува дека возачот на автомобилот успеал да се пробие на патот откако следел возило на брза помош кое му помагало на граѓанин за кој постоело сомнение дека имал срцев удар. Затоа, привремено беше дозволен пристапот по улицата Вотер, која беше блокирана.

„Како и со сите големи настани, имаме вооружено полициско присуство во текот на целиот ден. Немаше разузнавачки информации дека ќе се случи инцидент од ваков вид, затоа не се третира како тероризам“, рече началникот Симс.

Беше упатен уште еден апел да не се шпекулира за околностите на инцидентот и да не се споделува вознемирувачка содржина на интернет.