Нова државна поддршка за занаетчии и мали фирми: 11,3 милиони денари за модернизација и раст на конкурентноста
Занаетчиите, микро, малите и средните претпријатија ќе имаат можност да добијат финансиска поддршка од државата во висина од 11,3 милиони денари (околу 185 илјади евра), наменета за модернизација на производството и зајакнување на конкурентноста на домашниот пазар и пошироко.
Мерката предвидува кофинансирање од 40 отсто од оправданите трошоци, но не повеќе од 200 илјади денари (околу 3.252 евра) по апликант. Средствата ќе може да се користат за набавка на нови машини и алати со цел подобрување на продуктивноста и технолошката опременост.
Јавниот повик, кој го објави Министерството за економија и труд, се однесува на инвестиции реализирани во текот на 2025 и 2026 година, а крајниот рок за аплицирање е 30 јуни.
Министерот за економија и труд, Бесар Дурмиши, истакна дека целта на мерката е директна поддршка на домашните компании и подобрување на условите за работа.
„Целта на поддршката е да им се помогне на домашните компании да го модернизираат производството и да ја зголемат продуктивноста, создавајќи истовремено и подобри услови за работа“, изјави Дурмиши.
Тој додаде дека Владата продолжува со континуирана поддршка за малите бизниси и преработувачката индустрија, со фокус на раст и развој на домашната економија.
Според условите на повикот, право на учество имаат компании со мнозински домашен капитал и занаетчии регистрирани согласно закон, кои работат најмалку 12 месеци, имаат позитивен финансиски резултат во 2025 година и ги имаат подмирено обврските кон државата и вработените. Дополнително, апликантите не смеат да ја надминат границата за државна помош, а од програмата се исклучени фирми кои веќе користеле слична поддршка во претходните години.
Покрај оваа мерка, министерот најави и нови повици насочени кон иновации и унапредување на индустријата. Еден од нив предвидува кофинансирање од 70 отсто за воведување и сертификација на меѓународни стандарди, со максимална поддршка до 200 илјади денари по компанија.
„Со ова сакаме да им помогнеме на компаниите полесно да ги исполнат меѓународните стандарди, да се вклучат во глобалните синџири на добавувачи и да ја зголемат извозната конкурентност“, изјави Дурмиши.
Другиот повик е насочен кон соработка меѓу бизнис секторот и универзитетите, со вкупен фонд од пет милиони денари и исто така кофинансирање до 70 отсто.
Од Министерството апелираат компаниите и занаетчиите навремено да се информираат и да аплицираат, при што сите детали за условите и потребната документација се достапни на официјалната веб-страница.
