Нов систем за лекови за ретки болести: Пациентите да не чекаат ниту ден!
Министерот за здравство, Азир Алиу, најави промена во постапката за обезбедување лекови за пациентите со ретки болести, со цел навремена и континуирана достапност на терапијата.
Одговарајќи на новинарско прашање на вчерашната прес-конференција, Алиу истакна дека за првпат во државата се воведува тригодишна постапка за набавка на лекови за оваа категорија пациенти.
Тој посочи дека досега лековите се набавувале на годишно ниво, што често резултирало со доцнење во испораката, па пациентите понекогаш чекале по неколку недели или месеци за потребната терапија. Како што објасни, ретките болести се сè почести и кај нас и во светот, особено поради напредокот на технологијата и методологијата за рана детекција.
Дополнителен предизвик, според министерот, претставува фактот што дел од пациентите се млади, а терапијата се одредува според телесната тежина и други индивидуални параметри, што ја отежнува прецизната годишна проекција на потребните количини лекови.
Со новата методологија, тендерската постапка ќе се отвора за период од три години. Доколку во текот на тој период се потрошат поголеми количини од планираните, Министерството ќе има доволно време да започне дополнителна постапка, со цел да не дојде до прекин во снабдувањето.
Алиу нагласи дека целта на измените е пациентите со ретки болести да ја добиваат терапијата навреме и без прекини, потенцирајќи дека институциите нема да дозволат ниту еден пациент да остане без потребните лекови.
