Нов политички курс во Холандија: Поддршката за Украина е доведена во прашање
Нов политички курс во Холандија – поддршката на земјата за Украина е доведена во прашање, јавува Гласот на Америка (VOA). Неодамнешната победа на холандската екстремно десничарска Партија на слободата ги натера експертите да се прашуваат дали земјата ќе продолжи да и помага на земјата разурната од војна. Досега, Холандија е меѓу најистакнатите поддржувачи на Украина. Според податоците на Институтот за светска економија во Кил, до крајот на октомври Амстердам беше на седмото место според обемот на хуманитарна и воена помош за Киев. Земјата е исто така една од првите земји што објави дека ќе испрати борбени авиони Ф-16. Холанѓаните веќе испратија во Украина оклопни возила, противвоздушни ракетни системи, тенкови и преносни системи за противвоздушна одбрана.
За време на изборите на крајот на ноември, Партијата на слободата освои повеќе од која било друга политичка сила – 37 од 150 места во парламентот. По оваа победа, нејзиниот лидер Герт Вилдерс се обидува да формира коалициска влада во која тој ќе биде премиер. Во изјавата за новинарите на крајот на ноември, холандскиот министер за одбрана изрази надеж дека работите нема да се променат во новиот парламент. Но, Олонгрен, исто така, рече дека е загрижен за проруските чувства во формацијата, која сега има лидерска позиција, пренесе Гласот на Америка (VOA) .
Како и другите европски екстремно десничарски политичари, нејзиниот лидер Герт Вилдерс ја осудува руската инвазија на Украина, иако претходно покажа симпатии кон руската влада. Тој изјави дека Холандија треба да ја поддржи Украина, но само политички, без финансиска или воена помош. Од меѓународниот институт „Клингендал“ исто така веруваат дека идната помош на Холандија за Украина останува отворено прашање.
Според експертите, резултатите од парламентарните избори во Холандија покажуваат зајакнување на екстремно десничарските партии на Запад. Ова може да има последици не само за Украина, туку и за иднината на цела Европа, информира Гласот на Америка (VOA).
